“Woar bin ie dur iene van?” Det wordt nog wel is e-vroagd an een kind. Meensen wilt det graag weten en zeker op het plattelaand woar iederiene mekaar kent of wil kennen. Zelf wol ik det ok wel weten en doarum bin ik geïnteresseerd in genealogie, het familiestambomen onderzoek. Het leek mi’j zo mooi um van oonze beide families een stamboom te hebben. Nou, det is gelukt en het mooie is det ik er zelf niks veur hoeven te doen. Mien schoonzuster is doar arg goed in en getrouwd met een Holsappel. Toen ze die familie an het uutpluzen was kwam ze er achter dat argens rond 1800 er ok een familie Bouwhuis in veur kwam, wonende op het Bouwhuis van kasteel Gerner. Mien achtername is Bouwhuis en ja, van dezelfde tak. Dus die stamboom was gauw kloar. Ok de familie van Oenen is deur de schoonzuster uut e-zocht en die stamt uut Oene en omstreken. Lig veur de haand. Ik deenke dat wi’j nog wel varre familie van Bertus en Tonny Grotenhuus bint. De achtername van mien schoonmoeder was Knapen en die stamt uut Roalte en woonden later an de Bosrandweg. De familiename van mien moeder was Brink. Die was geboren in Zwolle, ging as kind noar Balkbrug en later noar Den Hulst. Ze had veul familie op de Veluwe. Een neve uut Rotterdam ging met die familiename an de gang en kwam er achter dat mien grootvader ok in Dalfsen was geboren. Dus eigenlijk woon ik dicht bi’j de plekke woar mien veurolders ok hebt e-woond. Wi’j bint gien wereldreizigers dus. Tegenwoordig kun ie det soort dingen gewoon op internet uutzuken, ie hoeft niet meer allerlei archieven of. Mar noe is tur vandage an de dag nog veul meer mogeluk. Ie kunt via oen DNA uutzuken woar al oen veurolders van of stamt. My Heritage heet det en met en bettie wangslijm pluust ze alles van oe uut tot an de Neanderthalers an toe. Heb ie Scandinavisch bloed of Zuudeuropees of Oosteuropees? Met al die volksverhuzingen deur de eeuwen hen zal hier in Oldlusen ok wel allerlei achtergrond zitten. Misschien bint er in Oldlusen wel luu die det al wel weet via My Heritage. Ik zol zeggen, niet mee blieven rondlopen. Deel het mee an het hele dorp. Det kan mooi via de Vechtanjer. Zo kom wi’j misschien wel tot een soort dorpsstamboom. Oons DNA. Woar bin ie dur iene van? Kiek mar in de Vechtanjer.
Willie van Oenen