STIENNIETGOED

Meert is de dialectmoand en now as het Nedersaksisch een officiéle taal is mut natuurlijk alles in’t plat, det mag van meij het hele joar wel, want ik kan het hädstikke goed proaten, mar duvels slecht lèèzn en schriem.
Mien va en moe hebt altied ezegd det ik goed mosse leern, det kump oe altied van passe, mar volgens meij kuj ok te völle leern, zodeij het zelf niet meer snapt wat ai zegt, mar onderdoems toch bliem denkn deij gliek hebt.
Now bint ze bezig de stienn an de kaante ùùt de Vechte te hààln, die hän ze der in elegd zodet de kaantn niet weg spuuln en de Vechte te ondiepe wön, want ik sprakke der iene uut Dalsn, die was toe as hij nog een jonge kjel was er wel is dwäs deur hèn eloopm. Mar now mut de Vechte zien “natuurlijke loop” weer kriegn, loat ze dan die stüwn der ok mar uut hààln, want die bint ok zo gruwelijk onnatuurlijk, het water löp toch wel woar as het het lèègste is, of niet dan. Die watergeleerde zèèt op de tillevisie det het een “half natuurlijke laaglandrivier “ mut wön, en woar as de stienn weg bint kump neije vegetatie van boam noar onder, en neije vegetatie hen en weer, en neije vegetatie terugge, en doar komt ok allemoale hele neije vissies en biessies zèèt die kulo, die konn näns aans in de Vechte terechte, allen woar as die stienn laagn, toe as die kjel ùùt eluld was heb ik mien pillegie enöm, die ik speciaal ekocht hebbe veur ak zok volk, en luu ùùt de politiek heure veurlèèzn ùùt eigen wärk. As die Vechte straks mooi ondiepe is en himoal vol met splinterneije vissies en biessies zit, en deij der weer deur hen könt loopm , könt de boern ùùt Oldluusn ok mooi met de bieste der deur hèn, könt die ok is adelijk grös vretn beij baron van Martels of op Rechtern of wiederop op “t laand van de hoge heern, sjonge wat zult ze mooi en dikke terugge komm.
Mar ien dink doet ze wel goed, zie brengt die stienn niet zo wied vot, zie ligt op de Stökte, mar now heurn ik det ze ‘tspul noar Zwolle wilt doen, det zok niet doen, want ie könt ze zo mar weer neudig wèèn, die loonwärker lacht zich de broek nat, hij hef de därtiende moand al in mei, hoe kuj het nog better kriegn.

Goos Wilm

Ai dit niet könt leezn muj op 12 meert mar in de Wiekelaar komm, dan zak um oe wel veurlèèzn, want dan lèèz ik veur ùùt eigen wärk, zonder pillegies, of het mut tèègn de zenuwm wèèn.