Neijjoars visite

Zo, wej kunt weer onze gank goan, alle regels bint erof,
zelfs det masker mag van de snoete of, ie kunt de
mèènsn weer kennen. Toch vun ik al die regels zo gek
nog niet, zoas det gelebber an mekaere, de brille
smerig en schief op de kop, man schei uut.
De oamtklokke vun ik zelfs glunig mooi, ai volk kreegn
waan ze mooi op tied nuus, aans bleem ze zitn tut ik
weet niet hoe late, now muk wel zegn det ik gien spier
better binne, ik denke ait, stel oe veur det een aander
die läste borrel opdrinkt, now ik het oaver die laste
borrel hebbe , muk an vrogger denkn toe
as ik een klein jonk ware, ik bin van net noa ’n oorlog
(en zo wok het ok graag hoaln) wej woon in ’t biesteveld
en doar heuln mien va en moe dan neijjoarsvisite veur
de buurn, zak oe verteln hoe det in zien wark gunk Um
een uur of zeum half achte waan ze der al, het was een
zoer stellegie, altied in veur een grappie, en ait goed te
passe.
Zie kreegn eerst koffie met een möppie of een vlakke
koeke met goeie botter, de vrolluu hän allemoale
breiwark mee, want niks doen det kon niet.
Bej de keerls zat een varkens en een peerdehandelaar
bej, dus das wej wel woar het oaver gunk.
As de koffie op was gung de keerls noar de delle , vee
kiekn, doarnao kwaamp de flesse op toafel, zie kreegn
een toassie met een vlakkie ei en een heel klei puntie
mayonaise erop, een augurkie met boterham worst en
een stukkie worst of keze.
De vrolluu drukn vake een citruuntie of einsgemaakte
wek, de keerls kreegn ait twee borrels, jenever of
cognac, of enkelt een flessie bier, en det was het.
Um goed tien uur half elf gung ze weer nuus, mar op
een keer wun het later, ik sleupe boam ’n heert en wun
wakker van het hädde gelach, zie hän een stienen hond,
die mien moe veur de schustien häd stoan een braande
sigare in de bek edoane, en mien moe häd niks in de
gaatn. De volgende män vreug ik an mien moe, wat was
det toch gisteroamt, toe verteln ze det van die hond,
mar zie zèèt det was zo arg nog niet, mar zie bleem
allemoal zitn er gunk gieniene nuus, en toe hef hoe va
ze een derde borrel in edoane, ik zeg oe: zo wörd het
een grote zoepparteije, iene grote zoepparteije.
Later is mien moe er wel anewent det er wat meer
edrunkn wun.
Umdet meert de dialectmoand is hek het dit keer zo
edoane,ik heb ok nog een verhaaltie kloar lign, det goa
ik 30 meert veurlèèzn in de wiekelaar um half achte en
dan mut jullie wat van die oale woordn roan wat het
betekent.
Ai tied en zin hebt, ie bint welkom, kiek mar wat ai
doet.

Now ajuu. Goos Wilm