ÈÈM VEURSTELN

Mien veurige lulverhaal gunk oaver excuus, now doar muk dan drekt met beginn, want doar stunt: [ g]een gelukkig neijoar, die g was te völle, mar det ai al wel begrepm natuurlijk.
Mar now bink alweer an de beurte um een stukkie te schriem, en eigenluk mut het oaver Oldluusn goan, det was de stelregel, mar ik wit zo niks, en dan goat schrievers altied oaver zich zelf schriem, dus doe ik det ok mar . Meert is dialect , en doar bink gek op, ik heb al 2 joar een dialect verhaal kloar veur de dialectoamt, dit keer zal het ok wel niet deurgoan, want die ploage wil mar niet oaver goan. Afijn ik bin Goos Wilm, ik bin er iene van Wilm Hendruk en Sina uut biesteveld, het biesteveld is ai bei Jan Wilm van Derk en Trientie het iernweggie op goat en dan rechts achter de oale heugraam, mien va en moe hebt doar net noar de oorlog een spullegie van Derk en Miene de Graaf ekocht . Ik bin in de mäshoek geboorn mar al rap noar Oldluusn egoane . In 72 wön der huusn ebouwd op het laand van Gait Jan Toerse, doar hek er iene van ekocht, en doar wone wèi nog steeds, mien wief kump van het laand van de hoge heern ‘millegen’ ’n aalshorst [Mina van Jan Wilm den kump doar ok vot] zie hiet eigenlijk Hendrukkie, en is er iene van Gait Wilm Westerhof en Jennegie van de Bosscher, die kwaamp ok uut Oldluusn, zo is de cirkel weer rond ,zeg mar. Wèi hebt 2 deerns iene woont in Zwolle en die aandere in Dalsn, zie hebt allebeide 2 jongn, gien deernties dus…… Ik heb 7 joar bei Eshuus ewärkt , ja zelfs de Dalser kraante hek edrukt, doarnoa hek 39 joar bei Jans van Gait van Peter en Hendrukkie ewärkt, ok hulp ik mien moat, Roelf van Märtend en Mine völle, now ik met pensioen binne doe ik det nog steeds, ik bin best wel vake vot .Hobby’s hek zo zeer niet, ik heb een stukkie bos tèègn oaver Hendruk en Griete van Wienholt, net veurbei , woar as vrogger Johan van Jan van Hans en Jan van Èvert ewoont hebt. Ik goa völle met mien Fergusunnegie noar det bos, det trekkertie hek ekocht van Epsie, die häd vrogger een rieschoele, doar hek mien riebewies ehààld, de lesn veur de vrachtauto hek van zien breur Johänsie ehäd, de va van die jongn det was Beernd Jan van Riekie uut de käámpe,die hef nog melk evaart met det trekkertie noar de Coodal in Dalsn. Ik goa met det trekkertie de bos deur en dan versnipper ik alle dooie takn in een hakselaartie, ik wil die bos netties hem. Eerst woonn Aaltie van Hans noast de bos, die zèèt, vrogger heuln Willem Buis en Zwager de bos schone now doe ie det. Ik heb ok Willem Buis espöld in det stuk wat Wim van Beernd Jan van Euln Wilm eschreem hef, det vun ik mooi um te doen, ik heb pas det boek nog weer elèèzn, toch wel iets apärts heur. Ik wit zeker det de mèènsn mèi hádstikke veur gek verkloart as ik doar in de bos lope te knooin, mar det heur ik toch niet, wat det betreft zal ik nooit gien geheurapparaat neudig hèm, want doar bint meer dingn die ik niet heurn wille as wel. Zo ik bin weer völ te langdroadig ewèst ik heb weer 152 woordn te völle. Ik hoppe dèi het kunt lèèzn, ans muj mar komm, mar dan wel iene veur iene hè.

Now ajuu hè Goos Wilm