de Mac Mansier

Joa ut mooiste olderwetse dorpscafe
uut de buurte en wat mis ik ut .
Deur det Corona gedoe maag ik dr niet henn en ik
niet allenig, nee niemand kan dr henn.
Mien vrouwe gunk met heur jongn noar de Mac
Donald en ik vund det zo vies , Hamburgers met
Tomaatn, Uin, Komkommers en alles deur menare.
Kiek een Varkn vret alles deur menare maar
een mense toch nie? Ik mut dus alles apart hemm
en ik luste gin Uin en al die aandere vieze prut. Dus
doarumme as mien vrouw noar de Mac Donald gunk ,
zei ik : ik goa noar de Mac Mansier.
Billy, Chris , Jannie en Dinie wet weh dat ik gin Uin
en Champions luste. Peerties graag een bettie warm
en een goed stuk Vleisch op mien burd.
Mar wej maagt dr nie meer henn en wat mis ik ut .
Gin dreun op mien scholders van Jan Pierik woar ik
2 daagn last van hebbe.
Gin Broekie an de bar en ok Martie en mien grote
vriend Aalt ziede ik nie meer .Gewoon ff een
proattie maakn met aander volk dan mien
personeel, klantn en familie. Kan nie vanwege
Corona wat alles stille leg. Ut liekt weh ien of
aandere knienen ziekte det Corona angstig det ut
ok zo snel de weerld över was.
Van China in een mum van tied hadde weh ut ok in
Dalfsn en Oldluusn.
Hoe söllt met Fritsie goane en Daniel, hoe vaake
heff hej sich van de wekke op de vingers esloane ?
Geert die zo’n prachtig verhaal had över sien
kerstboom thuus, dut hej de lichies nog
steeds uut soamps?
Die Engelse chauffeur met det steile kuiffie ziede
ik ok nie meer. Woar mut det nog henn? Wanneer
mag ut weer . De kaartclub , Opa drie en Jan
Bosch , mien grote PSV vriend.
De Biljartclub met Jan Dikke Lucht , van Luusn en
Herman. Giet dr altied nog ah serieus an toe as ze
competitie hebt. Dan bunt er steeds weer jongeluu
die noa iene minute weer een ander liedje op de
radio hemmn mut . Geduld hebt ze nie meer
teegwoordig.
Loat ze mar gauw de olde luu een spuittie geem
zodet die nie meer Corona kunt kriegn. De jeugd
wurd dr toch nie barre ziek van.
Kan ik weer noar de Mac Mansier, een duum dikke
Karbonade ettn , met Boernmix en warme Peerties.
Allemoale apart op mien burd. Een glaassie warme
rode Wien lust ik dr ok weh bej.
Tja , wanneer giet mien Mac weer löss ?
groetn Gruune Jopie