De dialict moand int Oostn

Mieters mooi is det toch, de hele moand wurde wej
verwent met dialect tekstn. TV Oost is dr een
fervent veurstander van, Dalfsennet ok en dr wurd
teegwoordig zelfs subsidie veur egeem deur
bieveurbeeld ijsselland.
Nö, ik heb nog nooit subsidie dr veur ekreegn.Kost
mej allenig mar tied en ik mut weh us een biertie
weggeven an de tap bej de Mac Mansier as iemand
commentaar hef.
Mar ak dan de postieve complimentn heure över
mien eerste stukkie in de Vechtanjer, wurd ik
toch bliede, en doar doek ut dan veur.
Meert is dus de dialectmoand int Oostn van t land.
Volgens mej in aandere Provincies nie. Wat
mej opvalt an de stukkies die dan in estuurt wurd,
dr is dr gin iene bej die utzelfde schrif.
Noe ist ok zo det ze in Dalfsen aanders proat dan
in Oldluusn en Nejluusn is ah weer aans.
Vaak bunt ut maar kleine verskillegies maar as ik
dan bieveurbeeld, iets wieder weg, Genemuudn
nemme, doar verstoat ie echt gin bal van, En zej
öns nie, das ok weh weer makkelik.
Kom ie een klein entie de grenze över bej
Coevorden dan kuj gewoon Oldluusens plat proatn
en sie verstoat oe en proat bienö utzelfde.
Raar toch? 40 km Westelijk en ie verstoat dr gin
klap van en de aandere kante, dus 40 km Oostelijk
en zelfs över de Duutse grens is dr weh
begriepelijke taal.
Wat ok zo raar is, is önze Vecht. Aj an de
Zuudelike kante komt hebt ze bienö utzelfde
taaltie maar toch hebt ze steeds over wulle en ulle.
Net as of die weurdies de Vechte nie över konn
kommn.
Joa , in de stad hebt ze över spraakgebrek en
domme boer maar loat det noe net nie zo wenne.
Is bewezen dat aj meertalig bunt , ie een hoger IQ
hebt. Noe kan ik dus goed dialect, Hollands red
ik mej ok prima met en ak över de grens bunne red
ik mej int Engels en Duuts ok prima . België
is ok gin probleem en ik bun in Egypte en Israël
ewest en doar reddn ik mej ok prima met mien
gebaarntaal . Dan mut ik toch weh een biezonder
hoog IQ hemmn.
Aju , tot de volgnde keer mar weer.
Groetn Gruune Jopie