Cruise Schip

Tien joar geleedn heb ik een Cruise op de
Middelandse Zee emak met de Norwegian Jade.
Een gigantisch groot schip woar weh 2500
duuzend man op kan.
Det Schip is bienö 300 meter laank en
det is ongeveer van Mansier tot an de turbo
rotonde.
Dan snap ie weh det de kapitein op de fietse
över de boot henn giet. En de kapitein is nie
allenig.
Nee hej heff weh ongeveer 1000 tot 1200 man
personeel an board.
Zoaterdag oamp maag ik graag een uurtie bej
Mansier zittn ouwehoern en lest zat ik doar
noast Wilfred.
Ik kom met hum an de proat en op een gegeem
moment över sien wark bej Robos op ’t Dalfser
industrieterein.
Afgeloopn wekke bun ik op een groot Cruisschip
ewest, toafelties en steulties monteern, zeg
hej. Meen ie nie, zeg ik. Doet jullie zuk wark?
Vroag ik an.
Joa, det doede wej ah joarn. In de haam van
Saint Nazere in Frankriek doar wurd van die
boatn emak. Wej goat de dan henn met twee
man en bunt doar veurnaamlijk bezig
met ut meubilair. Ooit ist begunt met de
levering van ligbeddn wat nie helemoale goed
gunk. Heff Robos
toen keurig op elöst en doardeur kreegn ze
meer wark.
Ok goade wej noar Paapnburg in Duutslaand, ok
een haam woar ze van die grote Cruisescheepn
maakt.
Ik stoa dr versteldt van, det wej dat in Dalfsen
ok nog doet. Van die hele grote Cruisscheepn
inrichtn.
Wie wet heb ik dus gewoon op een Dalfser
stuultie ezetnn in de Norwegian Jade en hebt
Dalfser monteurs det stuultie vast op ut dek
emonteerdt.
Groetn Gruune Jopie