ALLES (in’t) PLAT.

Meert , dialectmoand, det vin ik mooi, ‘k hoale doar wel van, ait niet könt lèèzen dan muj mar bellen, of de achttiende ‘soams in de Wiekelaar kommen, op de dialectoamt.
Wei hebt bei ons in de stroate een riege lindebomen stoan, die zit zowat het hele joar onder ‘t luus en bluuisel en wit ik niet wat veur rommel der allemoal of kump, het giet oaveral in zitten, Alle luu uut de stroate wilt graag van die bomen of, dus een brief noar ’t gemeentehuus, now ie road het wel hè, niks heur , die bomen wààn onderdeel van “de groene hoofdstructuur van Oudleusen” Toe hek zelf een brief noar gemeente huus edoane, ik krege een wies bescheid terugge, van ik denke een gruune biologische ambtenaar, zo’n iene die denkt det de soepgruunte an de bomen gruuit, zie zoln knoflook of zoiets in de grond spuiten en ik mosse mar wat vaker de stoepe vèègn en de dakgötte schone maken, now die stoepe en dakgötte hek niet zovölle last van , mar det ik die rotzooi in ’t hele huus hebbe, ja zelfs in bedde, doar bink stontziek van. Mar tieden verànderd, want as ik now in de kràante kieke zie ik alleent mar kapvergunningen, hier vieve, doar twintig, of ik wit niet hoevölle, ja het giet now zelfs bei de roew, zie könt het better meivergunning nuum, want det is toch gien kappen meer. Ik làse det ieken zo’n last hän van de stikstof, now hier kriegt ze de kans niet ,wan as de provincie langs kump lig ALLES PLAT.
Wei hän een duutse kennis die woon in de Eifel, die zèèt altied, het is bei jullie zo kààl, ie könt op woensdag al zien wie as er soaters op visite kump,nou tèèngwoordig dinses alwel denk ik. Ai heel goed kiekt kuj zowat zien of de spoorboom in de broekhuuzn dichte zit of lös bint, noar Ommen hen kiekn giet sträks niet zo gemakkeluk meer , want zie goat een viaduct bouwen veur de veugelties en andere biesies zodet ze ok is an de àànder kàànte van ’n Hessenweg könt kiekn,ik vroage mei wel of hoe ze det met de Vechte doet, want die biesies könt toch niet oaver de brugge, doar is het toch völ te druk, det is lèèms gevoarlijk. Ik wache nog èèm of hoe het giet met die lindebomen, want ik verwache dei binnenköt de kapvergunning zo uut de kràànte könt knippen, zeg mar as een soort weerdebonne, alhoewel ,an de rechtersediek mos die oale bende ok bliem stoan, en de jachtlusteralle doar mog ok oaste niks weg. Zo ik zie det ik zo’n bettie an mien tax binne met het aantal woorden,des jämmer want ik häd het ok nog oaver de regels van het paosvuur willen hem, det er mènsn bint die zoiets könt bedènken, Zo, ik nemme mien pillegie mar in ,dan wök weer mooi mak hop ik.
Kiek goed uut!!!!! (tèègn ’n boom an jaagn giet oaste niet meer.)

Nou de mazzel . Gooswilm